ត្បូងឃ្មុំ៖ ព្រះចៅអធិការវត្តអូរាំងឪ ព្រះរតនបញ្ញោ អ៊ិត គន្ធា មានសង្ឃដីកាប្រាប់ EAC ថា ត្រីប្រា ត្រីអណ្តែង ត្រីត្រសក់ និងត្រីឡាបយ៉ា ប្រមាណ ១ ២០០ក្បាលក្នុងស្រះវត្តអូរាំងឪ បានងាប់កាលពីល្ងាចថ្ងៃទី៣១ ខែកក្កដា ឆ្នាំ២០២៣។
ព្រះចៅអធិការវត្តអូរាំងឪមានសង្ឃដីកាថា អ្នកជំនាញបានមកត្រួតពិនិត្យដោយសន្និដ្ឋានថា ត្រីទាំងនោះងាប់អាចដោយសារតែខ្វះអុកស៊ីសែន ហើយក្នុងទឹកមានជាតិអាម៉ូញាក់ ខណៈការដាក់ចំណីត្រីមិនបានទៀងទាត់ល្អទើបបណ្តាលឱ្យត្រីពុលងាប់។
បើតាមព្រះចៅអធិការវត្តអូរាំងឪ ក្នុងចំណោមត្រីដែលងាប់ ភាគច្រើនជាត្រីប្រាដែលមានទម្ងន់ដល់ទៅ ៥គីឡូក្រាមក្នុងមួយក្បាល។ ជាមួយគ្នានេះត្រីអណ្តែង ត្រីត្រសក់ និងត្រីឡាប់យ៉ា ក៏បានពុលងាប់ផងដែរ ខណៈនៅសេសសល់ត្រីចង្វារ ត្រីឆ្ពិន និងត្រីផ្សេងៗទៀតដែលមិនទាន់ងាប់ ហើយខាងវត្តបានប្រមូលមកទុកក្នុងស្រះមួយផ្សេងទៀត។
ព្រះរតនបញ្ញោ អ៊ិត គន្ធា មានសង្ឃដីកាថា ត្រីប្រាដែលបានពុលងាប់នោះ ត្រូវបានវត្តចិញ្ចឹមតាំងពីឆ្នាំ២០១៥ មកម្ល៉េះ ក្រោយពុទ្ធបរិស័ទបានយកមកលែងក្នុងស្រះវត្តទុកឱ្យខាងវត្តចិញ្ចឹម។ ព្រះចៅអធិការវត្តបានបញ្ជាក់ថា ស្រះទឹកសម្រាប់ចិញ្ចឹមត្រីប្រានោះមានទំហំទទឹង ៣០ម៉ែត្រ បណ្តោយ ៥០ម៉ែត្រ មានជម្រៅ ៣ម៉ែត្រ។
ព្រះចៅអធិការវត្តអូរាំងឪ បានបញ្ជាក់ថាអ្នកជំនាញបានណែនាំឱ្យវត្តបូមទឹកស្រះចេញ ដើម្បីបន្តត្រួតពិនិត្យស្រាវជ្រាវអំពីមូលហេតុពិតប្រាកដដែលបណ្តាលឱ្យត្រីងាប់។ បើតាមព្រះរតនបញ្ញោ អ៊ិត គន្ធា ត្រីដែលងាប់នោះ វត្តបានផ្តល់ឱ្យពលរដ្ឋដែលនៅក្បែរវត្តយកទៅបរិភោគ៕